ជាដំណឹងដ៏រីករាយ! កម្ពុជាទទួលបាន «កូនផ្សោត» កើតថ្មីជាបន្តបន្ទាប់ នាដើមឆ្នាំ២០២៥ នេះ

ជាដំណឹងដ៏រីករាយក្រៃលែងសម្រាប់ចុងខែមករា ដើមឆ្នាំ២០២៥នេះ ដែលកម្ពុជាទទួលបានកូនផ្សោតកើតថ្មីចំនួន ២ក្បាល បន្ថែមទៀត នៅអន្លង់ត្បូងខ្លា ខេត្តស្ទឹងត្រែង។

បើតាមក្រុមការងារស្រាវជ្រាវនៃរដ្ឋបាលជលផល សហការជាមួយអង្គការ WWF បានឲ្យដឹងថាៈ ដើមឆ្នាំ២០២៥នេះ កម្ពុជាយើងទទួលបាន «កូនផ្សោត» កើតថ្មីចំនួនពីក្បាល ដោយកូនផ្សោតទី១ ត្រូវបានប្រទះឃើញកាលពីថ្ងៃទី២៣ ខែមករា ឆ្នាំ២០២៥ និងកូនផ្សោតកើតថ្មីទី២ត្រូវបានកំណត់អត្តសញ្ញាណនាវេលាម៉ោង២:១៥នាទីរសៀល នាថ្ងៃទី២៤ ខែមករា ឆ្នាំ២០២៥ ដដែល ពោលតែមួយថ្ងៃបន្ទាប់ពីប្រទះឃើញកូនផ្សោតកើតថ្មីទី១ នៅត្រង់ចំណុចអន្លង់ត្បូងខ្លា ស្ថិតក្នុងភូមិសាស្ត្រ ភូមិត្បូងខ្លា ឃុំអូម្រះ ស្រុកសៀមបូក ខេត្តស្ទឹងត្រែង។ កូនផ្សោតនេះស្ថិតនៅក្នុងក្រុមសត្វផ្សោតពេញវ័យចំនួន ៨ ក្បាល ផ្សេងទៀត និងបណ្តើរដោយផ្សោតមេដែលមានលេខកូដ៨៩។

ក្រសួងកសិកម្ម រុក្ខាប្រមាញ់ និងនេសាទ និងរដ្ឋបាលជលផល បានធ្វើការអំពាវនាវដល់អាជ្ញាធរមូលដ្ឋាន និងប្រជាពលរដ្ឋ សូមចូលរួមថែរក្សា និងការពារធនធានជលផលដ៏មានតម្លៃនេះ ទុកសម្បត្តិធម្មជាតិសម្រាប់កូនចៅជំនាន់ក្រោយបន្តទៀត និងសូមសហការផ្តល់ព័ត៌មានមកសមត្ថកិច្ចជលផល ក្នុងករណីបានប្រទះឃើញសត្វផ្សោត ពិសេសកូនផ្សោត តាមលេខទូរស័ព្ទ 099 79 19 19 និង 017 81 83 82៕ (សម្រួលអត្ថបទៈ រតនៈ ភារុន , ប្រភពៈ ក្រសួងកសិកម្ម រុក្ខាប្រមាញ់ និងនេសាទ)