មេដឹកនាំបក្សប្រឆាំងកូរ៉េខាងត្បូងដ៏ល្បី ត្រូវបានឃាតករវ័យ៦០ឆ្នាំម្នាក់ ចាក់ចំកញ្ចឹងករ អំឡុងពេលទស្សនកិច្ចតាមទីសាធារណៈនៅទីក្រុងប៊ូសាន

(បរទេស) ប៉ូលិសបាននិយាយថាមេដឹកនាំបក្សប្រឆាំងសេរីនិយមរបស់ប្រទេសកូរ៉េខាងត្បូង លោក Lee Jae-myung ត្រូវបានបញ្ជូនតាមយន្តហោះភ្លាមៗទៅកាន់មន្ទីរពេទ្យ បន្ទាប់ពីត្រូវបានគេចាក់ចំកញ្ចឹងក អំឡុងពេលបំពេញទស្សនកិច្ចទៅកាន់ទីក្រុង Busan ដ៏ល្បីល្បាញភាគអាគ្នេយ៍ប្រទេសកូរ៉េខាងត្បូងនៅថ្ងៃអង្គារនេះ។ មន្រ្តីប៉ូលិសទីក្រុងប៊ូសាន លោក Sohn Jae-han បាននិយាយថា លោក Lee ត្រូវបានដឹកបញ្ជូនតាមយន្តហោះទៅកាន់ទីក្រុងសេអ៊ូល បន្ទាប់ពីបានឆែកមុខរបួសដំបូងភ្លាមៗនៅមន្ទីរពេទ្យក្នុងទីក្រុងប៊ូសាន។

មកដល់ពេលនេះប៉ូលិស និងមន្ត្រីសង្គ្រោះបន្ទាន់បាននិយាយថា គាត់ដឹងខ្លួនបន្តិចក្រោយការវាយប្រហារ ហើយមិនស្ថិតក្នុងស្ថានភាពធ្ងន់ធ្ងរនោះទេ ប៉ុន្តែស្ថានភាពពិតប្រាកដរបស់លោកមិនត្រូវបានគេទម្លាយជាសាធារណៈនោះដែរ។ សូមបញ្ជាក់ថាលោក Sohn បានផ្តល់សន្និសីទខ្លីមួយថា ជនសង្ស័យដែលចាក់កញ្ជឹងករលោក Lee Jae-Myung គឺជាបុរសអាយុ 60 ឆ្នាំចំណាស់ម្នាក់ ហើយក្រុមមន្រ្តីកំពុងតែញ៉ាប់ដៃញ៉ាប់ជើងស៊ើបអង្កេតអំពីមូលហេតុនៅពីក្រោយហេតុការចាក់ដ៏អាក្រក់នេះ ។

ហេតុការណ៍នេះបានកើតឡើងនៅពេលដែលលោក Lee បានដើរកាត់ក្រុមអ្នកកាសែត និងអ្នកផ្សេងទៀត បន្ទាប់ពីលោកបានធ្វើដំណើរកម្សាន្តទៅកាន់ទីតាំងមួយដែលបានស្នើឡើងដោយក្រុមការងារអញ្ជើញចូលរួមនៅអាកាសយានដ្ឋានថ្មីនៅទីក្រុងប៊ូសាន។ លោក Sohn បាននិយាយថា មន្ត្រីគណបក្សប្រជាធិបតេយ្យដែលនៅជិតលោក Lee បានបង្ក្រាបអ្នកធ្វើឃាដនោះភ្លាមៗ មុនពេលមន្ត្រីប៉ូលីសឃាត់ខ្លួនរូបគេដែរ។

លោកបាននិយាយថាមកដល់ពេលនេះមន្ត្រីប៉ូលិសចំនួន ៤១ នាក់ត្រូវបានដាក់ពង្រាយទៅកាន់តំបន់នេះសម្រាប់គ្រប់គ្រងភាពឆោឡោនៃមនុស្ស និងគ្រប់គ្រងចរាចរណ៍ជាដើម។ សមាជិកគណបក្សប្រជាធិបតេយ្យរបស់លោក Lee បានហៅឧបទ្ទវហេតុនេះថា “ការវាយប្រហារបែបភេរវកម្មលើលោក Lee និងការគំរាមកំហែងយ៉ាងធ្ងន់ធ្ងរចំពោះលទ្ធិប្រជាធិបតេយ្យក្នុងប្រទេស” ។ ពួកគេបានអំពាវនាវឱ្យប៉ូលិសធ្វើការស៊ើបអង្កេតយ៉ាងឆាប់រហ័ស និង ម៉ត់ចត់បំផុត។ សូមបញ្ជាក់ថាលោក Lee បានបរជ័យលើការបោះឆ្នោតប្រធានាធិបតីកាលពីឆ្នាំ 2022 ជាមួយងនឹលោកប្រធានាធិបតី Yoon Suk Yeol ដោយត្រឹមតែ 0.7 % ប៉ុណ្ណោះ ដែលជាគម្លាតតូចចង្អៀតបំផុតមិនធ្លាប់មាននៅក្នុងការបោះឆ្នោតប្រធានាធិបតីកូរ៉េខាងត្បូង៕ (ប្រភពៈ ទទក)