ប្រជាពលរដ្ឋស្រុកត្រាំកក់លើកឡើងថា «សេចក្តីសុខសុវត្ថិភាពរបស់ពួកគាត់ ផ្ញើលើលោកអធិការ ឌុក ធីយ៉ា និងមន្ត្រីរបស់លោកហើយ…!»
ខេត្តតាកែវៈ ក្រោយទទួលបានបទបញ្ជាពីលោក ឧត្តមសេនីយ៍ទោ ឈាង ផាន់ណារ៉ា ស្នងការនគរបាលខេត្តតាកែវ និង ដោយមានការសម្របសម្រួលនីតិវិធី ពី ឯកឧត្តម ឯក ឆេងហួត ព្រះរាជអាជ្ញាអមសាលាដំបូងខេត្តតាកែវ កាលពីថ្ងៃទី២៤ ខែធ្នូ ឆ្នាំ ២០២៣ កន្លងទៅនេះ លោកវរៈសេនីយ៍ឯក ឌុក ធីយ៉ា អធិការ នៃអធិការដ្ឋាននគរបាលស្រុកត្រាំកក់ ដោយឆ្លងកាត់ការស៊ើបអង្កេតស្រាវជ្រាវយ៉ាងយកចិត្តទុកដាក់ បានដឹកនាំកម្លាំងសមត្ថកិច្ចក្រោមឳវាទ ចុះធ្វើការឃាត់ខ្លួនជនសង្ស័យម្នាក់ឈ្មោះ វន័ ទិ ភេទប្រុស អាយុ២២ឆ្នាំ នៅភូមិទន្លេនាមឃុំចំប៉ី ស្រុកអង្គរជ័យ ខេត្តកំពត ដើម្បីធ្វើការសាកសួរលួចមានស្ថានទម្ងន់ទោស។
បន្ទាប់ពីធ្វើការសាកសួរ ជនសង្ស័យឈ្មោះ វន័ ទិ បានឆ្លើយសារភាពថាខ្លួន និងបក្សពួកចំនួនពីរនាក់ទៀតមាន ឈ្មោះ ហាក់ វាយោ ភេទប្រុសអាយុ១៦ឆ្នាំ និងឈ្មោះ ហាក់ វេហា ភេទប្រុសអាយុ ២០ ឆ្នាំនៅភូមិទន្លេនាម ឃុំចំប៉ី ស្រុកអង្គរជ័យ ខេត្តកំពត បានធ្វើសកម្មភាពយកទុល្វីស និងដែកកងសម្រាប់ដាក់កូនសោរ គាស់នឹងឆ្កឹះសោរ ចូលលួចសម្ភារៈតាមកន្លែងវេលុយវីង និងតាមផ្ទះនៅទីប្រជុំជនបានចំនួន ០៨ លើក ដោយលើកទី១. នៅថ្ងៃទី១១ ខែកញ្ញា ឆ្នាំ២០២៣ វេលាម៉ោង ២៤:០០ ឈ្មោះ វន័ ទិ និងបក្សពួកបានយកទុល្វីសគាស់សោរចូលលួចយកសម្ភារៈនៅកន្លែងវីង នៅភូមិព្រៃស្រោង ឃុំអង្គតាសោម បានរង្វាន់ក្រវិលកំប៉ុងស្រាបៀរលក់បានប្រាក់ចំនួន៥០ ម៉ឺនរៀល។ លើកទី២. នៅថ្ងៃទី២១ ខែកញ្ញា ឆ្នាំ ២០២៣ វេលាម៉ោង២៤:០០ នៅចំណុចផ្សារអង្គតាសោម ខ្លួននិងបក្សពួកបានធ្វើសកម្មភាពគាស់សោរចូលលួចសម្ភារៈកន្លែងវេលុយវ៉ីង តែយកពុំបានសម្ភារៈអ្វីឡើយ។ លើកទី៣. នៅថ្ងៃទី២១ ខែវិច្ឆិកា ឆ្នាំ ២០២៣ វេលាម៉ោង២៤:០០នាទី ខ្លួនបានធ្វើសកម្មភាពយកទុល្វីសគាស់តូបកន្លែងវេលុយវ៉ីង លួចយកបានទូរសព្ទចំនួន ០២គ្រឿង នៅភូមិត្រពាំងរំពាក់ ឃុំត្រាំកក់ យកទៅលក់បានប្រាក់ចំនួន៧០ ដុល្លារ។ លើកទី៤. នៅថ្ងៃទី២៥ ខែវិច្ឆិកា ឆ្នាំ ២០២៣ម៉ោង ២៤:០០នាទី ខ្លួននិងបក្សពួកបានធ្វើសកម្មភាពយកទុល្វីសគាស់សោរកន្លែងវេលុយវ៉ីង នៅភូមិឬស្សីស្រុក ឃុំញ៉ែងញ៉ង យកបានទូរសព្ទចំនួន ០៩គ្រឿង។ លើកទី៥. នៅថ្ងៃទី២៥ ខែធ្នូ ឆ្នាំ ២០២៣ វេលាម៉ោង ២៤:០០នាទី ខ្លួនបានធ្វើសកម្មភាពគាស់កន្លែងវេរលុយវ៉ីង នៅក្នុងផ្សារអង្គតាសោម ស្ថិតភូមិអង្គតាសោម ឃុំអង្គតាសោម យកបានបារីម៉ាយសេវ៉ែន ចំនួន ០៨ សុងយកទៅលក់បានប្រាក់ចំនួន ៣០ម៉ឺនរៀល។ លើកទី៦. នៅថ្ងៃទី២១ ខែធ្នូ ឆ្នាំ២០២៣ វេលាម៉ោង ២៤:០០នាទី ខ្លួននិងបក្សពួកបានធ្វើសកម្មភាពគាស់ចូលលួចកន្លែងវេរលុយវ៉ីង នៅក្រុងដូនកែវ ខេត្តតាកែវ តែយកមិនបានសម្ភារៈអ្វីឡើយ។ លើកទី៧. នៅថ្ងៃទី ២២ខែធ្នូឆ្នាំ ២០២៣ វេលាម៉ោង ២៤:០០នាទី ខ្លួននិងបក្សពួកបានធ្វើសកម្មភាពគាស់សោកន្លែងលក់កុំព្យូទ័រនៅផ្សារតាកែវ ស្ថិតក្នុងក្រុងដូនកែវ តែលួចពុំបានសម្ភារៈអ្វីឡើយ។ លើកទី៨. នៅថ្ងៃទី ២៤ ខែធ្នូ ឆ្នាំ ២០២៣វេលាម៉ោង១:០០ រំលងអាធ្រាត្រខ្លួនបានធ្វើសកម្មភាពគាស់សោចូលលួចសម្ភារៈនៅកន្លែងវ៉ីងវេរលុយ របស់ឈ្មោះ ញ៉ិល សុភកញ្ញា ភេទស្រីអាយុ ៣១ឆ្នាំ ស្ថិតនៅក្នុងភូមិធ្នង់រលើង ឃុំលាយបូរ ស្រុកត្រាំកក់ ខេត្តតាកែវ តែយកពុំបានសម្ភារៈអ្វីឡើយ ដោយសារត្រូវម្ចាស់គេភ្ញាក់ទាន់ក៏រត់គេចខ្លួនតែម្តង។
ចំពោះការកំណត់អត្តសញ្ញាណ និងតាមប្រមាញ់ជនសង្ស័យ រហូតឈានដល់ការឃាត់ខ្លួនរបស់លោក វរសេនីយ៍ឯក ឌុក ធីយ៉ា អធិការ នៃអធិការដ្ឋាននគរបាលស្រុកតាំកក់ និងមន្ត្រីជំនាញនេះ ទទួលបានការសាទរជាខ្លាំងពីមហាជន ដោយពួកគាត់បានលើកឡើងថា «អធិការរូបនេះពិតជាមានសមត្ថភាព ឆន្ទះ មនសិការ បំរើប្រជាពលរដ្ឋពិតប្រាកដមែន មិនថាជនល្មើសរត់ដល់ទីណា លាក់ខ្លួននៅកន្លៀតណានោះទេ គឺលោកតែងតែទៅចាប់យកមកផ្តន្ទាទោសតាមច្បាប់ខាងតែបាន! សេចក្តីសុខសុវត្ថិភាពរបស់ពួកយើងជាប្រជាពលរដ្ឋ សង្ឃឹមលើកលោក និងមន្ត្រីក្រោមឳវាទរបស់លោកហើយ…!!»៕
