ត្រីរាជ ១ ក្បាល ប្រវែងជាង ២ ម៉ែត្រ ត្រូវបានប្រជានេសាទលែងចូលទៅក្នុងទន្លេសាបវិញ

ត្រីរាជ១ក្បាល ដែលមានទម្ងន់រហូតដល់ទៅ ១១៥ គីឡូក្រាម និងប្រវែងប្រវែង ២,២ ម៉ែត្រ ត្រូវបានលែងចូលទៅក្នុងទន្លេសាបវិញ បន្ទាប់ពីលោក ម៉ុត សាវឿន រស់នៅភូមិសង្វរ ឃុំកំពង់ហ្លួង ស្រុកពញាឪឮ ខេត្តកណ្តាល នេសាទបានកាលពីថ្ងៃទី១៤ ខែធ្នូ ឆ្នាំ២០២៣ កន្លងទៅ។

ការសម្រេចចិត្តលែងត្រីដ៏កម្ររបស់កម្ពុជាចូលទៅក្នុងទន្លេរសាបវិញ របស់លោក ម៉ុត សាវឿន នេះ ទទួលបានការសាទរជាខ្លាំងពីមហាជន ពិសេសរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ដោយសកម្មភាពនេះ គឺជាគំរូដ៏ល្អនិងមានតម្លៃមិនអាចកាត់ថ្លៃបាន ក្នុងការរួមចំណែកថែរក្សា ការពារ និងអភិរក្សប្រភេទត្រីដែលជិតផុតពូជ។

រដ្ឋបាលជលផល សូមអំពាវនាវដល់បងប្អូនអ្នកនេសាទយើង មេត្តាចូលរួមថែរក្សានិងការពារប្រភេទត្រីដែលជិតផុតពូជ ដោយលែងចូលក្នុងដែនទឹកធម្មជាតិវិញ នៅពេលនេសាទបាន ដើម្បីថែរក្សាវត្តមានរបស់ប្រភេទត្រីទាំងនេះឱ្យសំបូរ សម្រាប់កូនចៅជំនាន់ក្រោយ៕ ប្រភពៈ ក្រសួងកសិកម្ម រុក្ខាប្រមាញ់ និងនេសាទ