ហួសវាចានឹងថ្លែង! បំពានកាតព្វកិច្ចយ៉ាងធ្ងន់ធ្ងរហើយ ប្រឌិតរឿងមូលបង្កាច់បង្កូចកេរ្តិ៍ឈ្មោះ ធ្វើឲ្យសាធារណៈជនយល់ខុសលើម្ចាស់អចលនវត្ថុទៀត…!

(ព្រះសីហនុ) ជនជាតិចិនដែលបំពានកិច្ចសន្យាក្នុងការជួលដីសង់អគារធ្វើអាជីវកម្មយកប្រាក់ចំណេញ ហើយមិនខ្ចីអើពើបំពេញកាតព្វកិច្ចជូនដល់ម្ចាស់ដីដែលជាជនជាតិខ្មែរអស់ពេលជាច្រើនខែនោះ បាននឹងកំពុងធ្វើព្យុះធ្វើភ្លៀង បំពានការពិត មានគំនិតទុច្ចរិតពិសពុល ដោយទម្លាក់កំហុសទាំងស្រុងលើម្ចាស់ដី ដែលជាស្ត្រីមេម៉ាយ      មានជំងឺរ៉ាំរ៉ៃប្រចាំកាយ ធ្វើឲ្យសាធារណៈជនមានការយល់ច្រឡំយ៉ាងធ្ងន់ធ្ងរ នាំគ្នាជេរបញ្ចោហុយដីតាម       បណ្តាញសង្គម ដោយយោងតាមលំនាំព័ត៌មានខ្វះប្រភព ធ្វើឲ្យពួកគាត់យល់ថា «ខ្មែរធ្វើស៊ីចិន»។ រឿងរ៉ាងដ៏អយុត្តិធម៌បង្ករឡើងដោយជនជាតិចិនទាំងពីរនេះ ស្តិតនៅភូមិ៣ សង្កាត់លេខ៤ ក្រុង និងខេត្តព្រះសីហនុ។

យោងតាមកិច្ចសន្យាជួលចុះថ្ងៃទី១១ ខែមិថុនា ឆ្នាំ២០១៨ ប្រថាប់ត្រាទទួលស្គាល់ជាយថាភូតដោយមេធាវី រឿន ពិសី រវាងម្ចាស់អចលនវត្ថុ លោកស្រី គឹម ហោ កើតថ្ងៃទី២៣ ខែកុម្ភៈ ឆ្នាំ១៩៥២ កាន់អត្តសញ្ញាណបណ្ណសញ្ជាតិខ្មែរលេខ ១៣០០២២៦២០ មានអាសយដ្ឋានបច្ចុប្បន្នភូមិ៣ សង្កាត់លេខ៤ ក្រុង និងខេត្តព្រះសីហនុ ជាភាគី«ក» និងអ្នកជួលជាជនជាតិចិនឈ្មោះ ឃ្វី រ៉ែសៀន ភេទប្រុស កើតឆ្នាំ១៩៧១ កាន់លិខិឆ្លងដែនលេខ G3453907 និងឈ្មោះ វេន ស៊ិនជា ភេទប្រុស កើតឆ្នាំ១៩៦៩ កាន់លិខិឆ្លងដែនលេខ  EB7681149 អ្នកទាំងពីរមានអាសយដ្ឋាន ភូមិ៣ សង្កាត់លេខ៤ ក្រុង និងខេត្តព្រះសីហនុ ជាភាគី«ខ» បានព្រមព្រៀងជួលដីមួយកន្លែងទំហំ ៦០៤ ម៉ែត្រការ៉េ មានទីតាំងនៅភូមិ៣ សង្កាត់លេខ៤ ក្រុង និងខេត្តព្រះសីហនុ  ដោយនៅលើដីនោះមានផ្ទះវីឡាមួយ និងផ្ទះល្វែងកម្ពស់៣ជាន់ ដោយការជួលនោះមានរយៈពេល ១៥ ឆ្នាំ ដោយគិតចាប់ពីថ្ងៃទី១០ ខែមិថុនា ឆ្នាំ២០១៨ រហូតដល់ថ្ងៃទី០៩ ខែមិថុនា ឆ្នាំ២០៣៣ ទើបបញ្ចប់ ដោយថ្លៃជួលក្នុងមួយខែចំនួន ១៥.០០០ ដុល្លារ សម្រាប់រយៈពេល៥ឆ្នាំលើកទី១, តម្លៃជួល៥ឆ្នាំលើកទី២ ចំនួន ១៦.៥០០ ដុល្លារ ក្នុងមួយខែ និងចំនួន ១៨.៤៨០ ដុល្លារ ក្នុងមួយខែ សម្រាប់រយៈពេល ៥ឆ្នាំ លើកទី៣ ដោយត្រូវឲ្យបង់ប្រាក់ឈ្នួលរៀងរាល់១ខែម្តង និងរៀងរាល់ថ្ងៃទី១០ នៃខែបន្តបន្ទាប់ ដោយបង់ជាសាច់ប្រាក់ផ្ទាល់ ឬបង់ចូលទៅក្នុងគណនីធនាគាររបស់ភាគី «ក» ដោយមិនអាចហួសរយៈពេល ៧ ថ្ងៃ នៃថ្ងៃបង់បានឡើយ។ ក្នុងករណីហួសរយៈពេលត្រូវបង់ ភាគី «ក» មានសិទ្ធិពិន័យប្រាក់ភាគី «ខ» ចំនួន ២០ ភាគរយ នៃប្រាក់ឈ្នួលសរុប បន្ថែមលើប្រាក់ឈ្នួលប្រចាំខែ ប៉ុន្តែការយឺតយ៉ាវមិនអាចហួសរយៈពេល ៦០ ថ្ងៃ បានឡើយ។ ប្រសិនបើហួសរយៈពេលនេះ     ភាគី «ក» មានសិទ្ធិរំលាយកិច្ចសន្យាជួលនេះ ហើយប្រាក់កក់ចំនួន  ១៥០.០០០ ដុល្លារ និងសំណង់ដែល ភាគី «ខ» បានសាងសង់លើអចលនវត្ថុ ដែលជាកម្មវត្ថុនៃការជួលនេះ និងក្លាយជាកម្មសិទ្ធិរបស់ភាគី «ក»។

នៅក្នុងកិច្ចសន្យាដដែលបានបញ្ជាក់យ៉ាងច្បាស់ថា «ភាគី ខ» មិនអាចយកប្រាក់កក់នេះមកធ្វើការទូទាត់ថ្លៃឈ្នួលប្រចាំខែបានឡើយ ដោយប្រាក់កក់នេះជាប្រាក់ធានាក្នុងការអនុវត្តកិច្ចសន្យា ហើយភាគី «ក» នឹងប្រគល់ប្រាក់កក់គ្របចំនួន ឲ្យទៅភាគី «ខ» វិញនៅពេលផុតកំណត់ ឬបញ្ចប់កិច្ចសន្យា»។ នោះមានន័យថា ភាគី «ខ» មិនអាចយកលេសប្រាក់កក់ ថាជាការទូទាត់ថ្លៃឈ្នួលប្រចាំខែឲ្យទៅភាគី «ក» បានជាដាច់ខាត។

ក្នុងដំណើរការកិច្ចសន្យាយថាភូត ឈ្មោះ ឃ្វី រ៉ែសៀន និង ឈ្មោះ វេន ស៊ិនជា ដែលជាភាគី «ខ»​ មិនបានបំពេញកាតព្វកិច្ចដូចមានចែងនោះទេ ដោយខកខានបង់ថ្លៃជួលអចលនវត្ថុជូនលោកស្រី គឹម ហោ ជាច្រើនខែ បើទោះជាលោកស្រីចេញលិខិតជូនដំណឹងទៅជនជាតិចិនទាំងពីរនោះជាច្រើនលើកច្រើនសារក៏ដោយ ក៏ជនជាតិចិនទាំងពីរនោះ មិនអើពើបង់ជូនលោកស្រីនោះឡើយ ធ្វើឲ្យលោកស្រីខាតបង់ប្រយោងជន៍ ជំពាក់ប្រាក់ធនាគារយ៉ាងធ្ងន់ធ្ងរ។

លោកស្រី គឹម ហោ តាមរយៈមេធាវីតំណាដោយអាណត្តិ បានឲ្យដឹងថា «ការបន្តផ្គើន ធ្វើមិនដឹងមិនឮ ម្តងហើយម្តងទៀតរបស់ជនជាតិចិនទាំងពីនេះ ជាទង្វើបំពានលើកិច្ចសន្យាយ៉ាងធ្ងន់ធ្ងរ ហើយក៏ជាការមើលស្រាលច្បាប់ស្រុកខ្មែរពេកណាស់ដែរ ជាហេតុធ្វើឲ្យលោកស្រីមិនអាចទ្រាំនឹងការមើលងាយតទៅទៀតបាន ថែមទាំងរីងស្ងួនចិត្តសណ្តោសប្រណី លោកស្រីបានសុំឲ្យមេធាវីរៀបចំនីតិវិធីរំលាយកិច្ចសន្យាចុះថ្ងៃទី១០ ខែមិថុនា ឆ្នាំ២០១៨ នោះចោល និងបានធ្វើពាក្យសុំដីកា សម្រេចរក្សាការពារ ដាក់ចូលទៅសាលាដំបូងខេត្តព្រះសីហនុ នាថ្ងៃទី០១ ខែកញ្ញា ឆ្នាំ២០២០។

យោលើអង្គហេតុជាក់លាក់របស់លោកស្រី គឹម ហោ និងដោយបានអង្កេតយ៉ាងជាក់លាក់ ប្រើពេលជាង១ឆ្នាំសាលាដំបូងខេត្តព្រះសីហនុបានចេញ «ដីកាសម្រេចចាត់ចែងជាបណ្តោះអាសន្ន» លេខ​៤៥៣/ក.រ/ឆ/២២ ចុះថ្ងៃទី០២ ខែធ្នូ ឆ្នាំ២០២២ បង្គាប់ឲ្យកូនបំណុលឈ្មោះ ឃ្វី រ៉ែសៀន «QIU RUIXANI» និងឈ្មោះ វេន ស៊ិន ជា «WEN XIN JIA» ប្រគល់ សិទ្ធិកាន់កាប់ ប្រើប្រាស់ និងអាស្រ័យនៅ នូវដីទំហំ ៦០៤ ម៉ែត្រការ៉េ និងសំណង់អគារដែលមាននៅលើដី ស្ថិតនៅភូមិ៣ សង្កាត់លេខ៤ ក្រុង និងខេត្តព្រះសីហនុ មានវិញ្ញាបនបត្រសម្គាល់អចលនវត្ថុលេខ ១៨០១០៤០៣-០០០៧ ចុះថ្ងៃទី០១ ខែធ្នូ ឆ្នាំ២០០៥ ឲ្យម្ចាស់បំណុលឈ្មោះ គឹម ហោ ជា      បណ្តោះអាសន្ន និងបង្គាប់ឲ្យកូនបំណុលចាកចេញពីសំណង់អគារជាបណ្តោះអាសន្នសិន រង់ចាំតុលាការសម្រេចលើបណ្តឹងអង្គសេចក្តី។ ដែលដីកាសម្រេចនេះ មានអានុភាពអនុវត្តភា្លម ទោះជាមានបណ្តឹងតវ៉ាក៏ដោយ។

ក្រោយសាលាដំបូងខេត្តព្រះសីហនុ ចេញដីកា «សម្រេចចាក់ចែងជាបណ្តោះអាសន្ន»  ជនជាតិចិនទាំងនោះកើតទុក្ខមិនសុខចិត្ត ពុតធ្វើជាស្រែកឡាំប៉ា ចោទថាអយុត្តិធម៌  ដោយយកព័ត៌មានឲ្យជួយវាយប៉ោត ទូងស្គរ អង្វរស្នើសុំការអន្តរាគមន៍ពីក្រសួងយុត្តិធម៌ ធ្វើឲ្យមហាជនយល់ច្រឡំ ប្រតិកម្មរិះគន់ជាន់«ក»ម្ចាស់អចលនវត្ថុតាមបណ្តាញសង្គមព្រោងព្រាត ដោយជនជាតិចិនទាំងនោះទម្លាក់កំហុសគ្រប់យ៉ាងលើករណីប្រធានសក្តិ នៃជំងឺកូវីដ-១៩ ដែលជាហេតុនាំឲ្យខ្លួនមិនអាចអនុវត្តកាតព្វកិច្ចបាន។

ជុំវិញករណីនេះលោកមេធាវី នាង គីមហុង ជាមេធាវីតំណាងដោយអាណត្តិឲ្យលោកស្រី គឹម ហោង បានធ្វើសេចក្តីថ្លែងការណ៍បំភ្លឺ គោរពជូនឯកឧត្តមរដ្ឋមន្ត្រីក្រសួងយុត្តិធម៌ ដោយលើកឡើងនូវហេតុផលឈានដល់ការរំលាយកិច្ចសន្យាជួល បញ្ជាក់យ៉ាងដូច្នេះថា អំពើរបស់ជនជាតិចិនខាងលើ ធ្វើឲ្យកូនក្តីរបស់លោកជួបនូវផលលំបាកជាច្រើនដូចជាៈ ១. ជាប់បំណុលធនាគារភ្នំពេញពាណិជ្ជជិត ៥ សែនដុល្លារ ដោយសារជនជាតិចិនទាំងនោះមិនបង់ថ្លៃឈ្នួល ធ្វើឲ្យកូនក្តីលោកគ្មានលុយបង់ឲ្យធនាគារ ជាហេតុធ្វើឲ្យខាងធនគារចេញលិខិតជូនដំណឹងជាច្រើនលើកច្រើនសារ ឈានរហូតប្តឹងឡើងតុលាការសាលាដំបូងខេត្តព្រះសីហនុថែមទៀតផង។ ត្រង់ចំណុចនេះសបញ្ជាក់ឲ្យឃើញថា ជនជាតិចិនដែលជួលអចលនវត្ថុកូនក្តីរបស់លោក មិនអាចយកហេតុផលជំងឺកូវីដ-១៩ ដើម្បីមិនអនុវត្តកាតព្វកិច្ចបានឡើយ ព្រោះរាល់គ្រឹះស្ថានធនាគារ គ្រឹះស្ថាន ឯកជន និងសាធារណៈនៅដំណើរការធម្មតា ហើយចំពោះកូនក្តីលោកគឺធនាគារនៅតែដាក់ពាក្យប្តឹងទាមទារប្រាក់ដដែលដូចគ្នា។​ ២. ដោយសារហេតុផលរបស់ជនជាតិចិននេះហើយ ធ្វើឲ្យកូនក្តីរបស់លោកមានជំងឺផ្លូវ ចិត្ត និងធ្វើឲ្យមានជំងឺប្រចាំកាយ ដោយបច្ចុប្បន្នស្ថិតក្រោមការតាមដានព្យាលបាលពីគ្រូពេទ្យផងដែរ។        ៣. កូនក្តីលោកខាតប្រជោជ៍ជាច្រើនដូចជាសោហ៊ុយមេធាវី សោហ៊ុយដាក់ពាក្យបណ្តឹង និងសោហ៊ុយផ្សេងៗជា ច្រើនទៀត។

ដូចអ្វីដែលបានរៀបរាប់ខាងលើ និងការបញ្ជាក់របស់លោកមេធាវី នាង គីមហុង លោកស្រី គឹម ហោ ជឿជាក់ថា មហាជនឈប់មានការយល់ច្រឡំ និងសង្ឃឹមថាច្បាប់នឹងអនុវត្តយ៉ាងតឹងរឹងលើជនជាតិចិនដែលមិនបានបំពេញកាតព្វកិច្ចជូនអ្នកស្រីហើយ ថែមទាំងប្រឌិតរឿងបង្ខូចបង្កាច់កេរ្តិ៍ឈ្មោះលោកស្រីទៀត។ សង្ឃឹមថាខាងសារព័ត៌មានដែលបានផ្សាយខុសពីការពិត មេត្តាផ្សាយកែតម្រូវឡើងវិញ។

ទោះជាយ៉ាងនេះក្តីអង្គភាពសារព័ត៌មានយើងមិនអាចសុំការបំភ្លឺណាមួយពីភាគីជនជាតិចិនបានទេ ព្រោះគ្មានលេខទូរស័ព្ទ។ អង្គភាពយើងរង់ចាំការស្រាយបំភ្លឺពីគ្រប់ភាគីពាក់ព័ន្ធរៀងរាល់ម៉ោងធ្វើការ៕