លោកវរៈសេនីយ៍ឯក ឌុក ធីយ៉ា អធិការស្រុកត្រាំកក់ ដឹកនាំកម្លាំងតាមចាប់ចោរឆក់ខ្សែ-ក ដោយក្របួចបានទាំងអស់!

ខេត្តតាកែវ : ករណីជនសង្ស័យចំនួនបីនាក់បន្លំលួចខ្សែកផ្លាកទីន កាលពីថ្ងៃថ្ងៃសៅរ៍ថ្ងៃទី០១ ខែមេសា ឆ្នាំ២០២៣ នៅវេលាម៉ោង ១៤:២០ នាទី នៅចំណុចទូលក់មាស ស្ថិតនៅក្នុងភូមិ ឬស្សី១គុម្ភ ឃុំអូរសារាយ ដែលជនរងគ្រោះជាម្ចាស់ឈ្មោះ ហាប់ លី ភេទស្រី អាយុ ៥០ឆ្នាំ មានទីលំរស់នៅភូមិទួលខ្លុង ឃុំអូររាយ ស្រុកត្រាំកក់ខេត្តតាកែវ។

ករណីអំពើលួចមានស្ថានទម្ងន់ទោសនេះ បង្កឡើងដោយមានជនសង្ស័យមិនស្គាល់អត្តសញ្ញាណមួយក្រុមមានគ្នារចំនួន ០៣ នាក់ ជិះរថយន្តម៉ាក់ តូយ៉ូតាព្រូសពណ៌ប្រផេះ គ្មានផ្លាកលេខបានចូលធ្វើសកម្មភាពសុំមើលខ្សែករផ្លាកទីនដើម្បីទិញ នៅពេលដែលម្ចាស់យកចេញពីទូហុចមកឲ្យជនសង្ស័យមើល ស្រាប់តែជនសង្ស័យបានឆក់យកពីដៃម្ចាស់អ្នកលក់រួចរត់ឡើងរថយន្តរបស់ក្រុមខ្លួន ជិះរត់កិច្ចខ្លួនតាមផ្លូវលេខ ១៣២ ទៅទិសខាងលិចហើយបទតាមផ្លូវដីឡូ មកឡើងផ្លូវជាតិលេខ៤១ ទៅទិសខាងជើងបាត់ស្រមោល។

ក្រោយពេលទទួលបានព័ត៌មាន និងទទួលបទបញ្ជាពីលោកឧត្តមសេនីយ៍ទោ ឈាងផាន់ណារ៉ា ស្នងការ នៃស្នងការដ្ឋាននគរបាលខេត្តតាកែវ នឹងដោយមានការសម្របសម្រួលពីលោក ឯក ឆេងហួត ព្រះរាជអាជ្ញាអមសាលាដំបូងខេត្ត និងកម្លាំងជំនាញ នៃអធិការដ្ឋាននគរបាលស្រុកត្រាំកក់ ដឹកនាំដោយលោកវរៈសេនីយ៍ឯក ឌុក ធីយ៉ា អធិការនគរបាលស្រុកត្រាំកក់ សហការជាមួយកម្លាំង នៃអធិការដ្ឋាននគរបាលស្រុកបរសេដ្ឋ បានចុះធ្វើប្រតិបត្តិការស្ទាក់ និងដេញតាមជនសង្ស័យ។ លុះមកដល់ចំណុចជើងភ្នំល្អាងស្ថិតក្នុងភូមិធ្លក ឃុំស្វាយចឹប ស្រុកបសេដ្ឋ ខេត្តកំពង់ស្ពឺ ជនសង្ស័យក៏បានចុះពីលើរថយន្តរួចរត់គេចខ្លួនឡើងទៅលើភ្នំ ខណៈពេលនោះកម្លាំងសមត្ថកិច្ចក៏បានដេញតាមឃាត់ខ្លួនជនសង្ស័យបានចំនួន ០៣នាក់។ រួមមាន

១.ឈ្មោះ គឹម លីហួត ប្រុសអាយុ ១៨ ឆ្នាំនៅភូមិមេគង្គ សង្កាត់និរោធ ខណ្ឌច្បារអំពៅ ក្រុងភ្នំពេញ ជាម្ចាស់រថយន្ត និងជាអ្នកបើកបរ។

២.ឈ្មោះ សួន ពុទ្ធារិទ្ធ ភេទប្រុសអាយុ ១៧ ឆ្នាំនៅភូមិចាម សង្កាត់ជ្រោយចង្វារ ខណ្ឌឫស្សីកែវ ក្រុងភ្នំពេញ។

៣.ឈ្មោះ លី ខៀង ភេទប្រុសអាយុ ១៦ឆ្នាំនៅភូមិចាម សង្កាត់ជ្រោយចង្វារ ខណ្ឌឫស្សីកែវ រាជធានីភ្នំពេញ (ជាអ្នកចូលឆក់)

ក្នុងប្រតិបត្តិការបង្ក្រាបនោះកម្លាំងសមត្ថកិច្ច បានដកហូតវត្ថុតាង រួមមាន÷

ស្លាកលេខរថយន្តមុខក្រោយដែលមានលេខភ្នំពេញ 2BP 3306 ចំនួន ០២ សន្លឹករថយន្តម៉ាក toyota prius ចំនួន ០១គ្រឿង ពណ៌ប្រផេះដែលជាកម្មសិទ្ធិរបស់ឈ្មោះ គឹម លីហួ, ខ្សែ-ក លោហៈធាតុពណ៌លឿង១ខ្សែ (ផ្លាកទីន) និងឯកសារបង់រំលោះរថយន្ត។

គួរបញ្ជាក់ថាៈ ក្នុងពេលធ្វើការប្រតិបត្តិការ បង្ក្រាបមុខសញ្ញាខាងលើនេះ បានធ្វើឲ្យរងរបួសដល់កម្លាំងសមត្ថកិច្ចម្នាក់បាក់ជើង និងខូចខាតរថយន្តចំនួន ០៣គ្រឿងផងដែរ។ បច្ចុប្បន្នជនសង្ស័យនិងវត្ថុតាងសមត្ថកិច្ចកំពុងធ្វើការសាកសួរកសាងសុំរឿងទៅតាមនីតិវិធីច្បាប់៕