កូនប្រុសស្រី ៣ នាក់ ក្លែងបន្លំឯកសារ លួចដកលុយម្ដាយ ចំនួន ៣៨ ម៉ឺនដុល្លារ ថែមទាំងដៀលម្ដាយថាជាសត្វឆ្កែទៀតផង!

ព្រះសម្មាសម្ពុទ្ធព្រះបរមគ្រូនៃយើង បានធ្វើការបែងចែកកូនប្រុសស្រីជា ៣ ប្រភេទគឺ អតិជាតបុត្តៈ ជា កូន ប្រកប ដោយបុណ្យ កូនដែលមិនចាំឱ្យឪពុក ម្ដាយ ទូន្មាន ទេ ខ្លួនចេះ ដឹង នូវ អំពើ ខុស ត្រូវ ថែមទាំងនាំផ្លូវឪពុកម្ដាយបានប្រព្រឹត្តនូវធម៌ជាកុសលទៀតផង។ អនុជាតបុត្តៈ ជា កូន ដែល ដើរ តាម គន្លង ដំបូន្មានរបស់ ឪពុក ម្ដាយ។ ឪពុក ម្ដាយ ទូន្មាន ឲ្យ ដើរ តាម ផ្លូវ ល្អ ជា សុចរិត ក៏ធ្វើ តាម មិន ឲ្យ ខុស ឆ្គាំ ឆ្គង ឡើយ។ ដោយឡែកអវជាតបុត្តៈ ជាកូនបាប មិនដើរតាមគន្លងនៃការប្រៀនប្រដៅរបស់ឪពុកម្ដាយ តែងតែធ្វើបាបអំពល់ទុក្ខដល់ឪពុកម្ដាយតាំងពីក្មេងរហូតដល់ចាស់ បើទោះជាមានគ្រួសារហើយ ក៏នៅតែអំពល់ទុក្ខដល់ឪពុកម្ដាយដដែល ពេលខ្លះកូនជំពួកនេះអាចនឹងឈានទៅដល់ការប្រើអំពើហិង្សា ឬលួចទ្រព្យសម្បត្តិឪពុកម្ដាយថែមទៀតផង នេះវាមិនខុសអ្វីពីករណីលោកយាយ ប្រាក់ ចំរើន អាយុ ៧០ ឆ្នាំ ដែលស្ត្រីមេម៉ាយ ត្រូវបានកូនបង្កើតក្លែងបន្លំឯកសារ លួចយកលុយរបស់គាត់ពីធនាគារចំនួន ៣៨ ម៉ឺនដុល្លារនោះទ។

ក្នុងទឹកមុខដ៏ស្រពាប់ស្រពោន រួមផ្សំទឹកភ្នែករលីងរលោងផង លោកយាយ ប្រាក់ ចំរើន រស់នៅភូមិព្រៃសខាងលិច សង្កាត់ព្រៃស ខណ្ឌដង្កោ រាជធានីភ្នំពេញ បានរៀបរាប់ប្រាប់អ្នកសារព័ត៌មានយើងឲ្យដឹងថាៈ លុយចំនួន ៥៣ ម៉ឺនដុល្លារ ដែលជាលុយបានមកពីការលក់ដីរបស់លោកយាយ នឹងទុកដើម្បីចែកកូន ចែកចៅ និងសម្រាប់ខ្លួនឯងចាស់ផងនោះ ត្រូវបានកូនបង្កើតប្រុសស្រី ៣ នាក់ រួមមានឈ្មោះ សែម សុធារី ឈ្មោះ សែម វិរៈ និងឈ្មោះ សែម សំអុល ដែលគាត់ខិតខំទំនុកបំរុងឲ្យសិក្សារៀនសូត្ររហូតបានក្លាយជាមន្ត្រីប៉ូលិស មានតួនាទីជានាយរងប៉ុស្តិ៍រដ្ឋបាលសង្កាត់ព្រៃសនោះ សមគំនិតគ្នាធ្វើឯកសារក្លែង លួចដកយកអស់ ៣៨ ម៉ឺនដុល្លា ទៅស៊ីចាយសប្បាយហ៊ឺហា ថែមទាំងបានពោលពាក្យប្រមាថមាក់ងាយរូបគាត់ជាម្ដាយ ថាជាសត្វឆ្កែថែមទៀតផង។

លោកយាយបានបន្ថែមថា គាត់មិនបានដឹងថាកូនៗរបស់គាត់មានគំនិតអាក្រក់មកលើរូបគាត់តាំងពីពេលណានោះទេ ថ្ងៃមួយពួកគេបានរៀបចំឯកសារអ្វីមិនដឹង ហើយបានចាប់បង្ខំឲ្យគាត់ផ្តិតមេដៃលើឯកសារនោះ ដោយឈ្មោះ សែម សុធារី បានប្រាប់គាត់ថា ប្រញាប់យកឯកសារនោះ ទៅស៊ីញ៉េបោះត្រានៅខណ្ឌ ម៉ែឯងផ្តិតមេដៃឱ្យលឿនៗមក។ លុះក្រោយមកទើបគាត់បានដឹងតាមរយៈចៅសង្កាត់ព្រៃសថា លុយចំនួន ៣៨ ម៉ឺនដុល្លារ ក្នុង ៥៣ ម៉ឺនដុល្លា ត្រូវបានកូនៗរបស់គាត់លួចដកយកទៅទិញឡាន និងស៊ីចាយសប្បាយជាមួយបនភឿនអស់ហើយ។

លោកយាយ ប្រាក់ ចំរើន បានរៀបរាប់បញ្ជាក់ទាំងជួលដើមគាត់ថាៈ លុយត្រូវបានកូនលួចអស់មួយចំនួនធំ ពេលដែលគាត់សួរនាំ បែរជាកូនៗទាំងនោះដៀលគាត់ជាម្ដាយថាជាសត្វឆ្កែ គាត់ពិតជាឈឺចាប់ខ្លាំងណាស់ និងសូមស្នើសុំឲ្យស្ថាប័នមានសមត្ថកិច្ច មេត្តាជួយរកយុត្តិធម៌ដល់គាត់ផង គាត់ស្ទើរតែប្រេះទ្រូងស្លាប់ឥឡូវហើយ ឱកូនអើយកូន ម៉េចក៏ធ្វើបែបនេះដាក់ម្ដាយ។

សកម្មភាពនៃការសមគំនិតប្រព្រឹត្តិអំពើមិនគួរគប្បីមកលើម្ដាយដែលជាព្រះរស់របស់ឈ្មោះ សែម សុធារី ឈ្មោះ សែម វីរៈ និងឈ្មោះ សែម សំអុល មានតួនាទីជានាយរងប៉ុស្តិ៍រដ្ឋបាលសង្កាត់ព្រៃស គឺជាអំពើលួច នេះបើយោងតាមមាត្រា ៣៥៣ ក្រមព្រហ្មទណ្ឌ នៃព្រះរាជាណា ចក្រកម្ពុជា នឹងត្រូវផ្ដន្ទាទោសតាមអំណាចមាត្រា ៣៥៦ នៃក្រមដដែលនេះ។

អង្គភាពសារព័ត៌មានយើងមិនទាន់អាចសុំការបំភ្លឺណាមួយពីបុគ្គលពាក់ព័ន្ធទាំងបីខាងលើទេ ព្រោះគ្មានលេខទូរស័ព្ទ បើទោះជាយ៉ាងនេះក្តី អង្គភាពយើងនៅតែរក្សាជំហរផ្សាយកែតម្រូវប្រសិនបើមានភស្តុតាងផ្ទុយ៕