លោកផ្កាយបី ប្រើត្រកូលថ្នាក់ដឹកនាំ ដើរបោកលុយប្រជាពលរដ្ឋយ៉ាងរំភើយ
ភ្ភ្នំពេញៈ នគរបាលព្រហ្មទណ្ឌ នៃអធិការដ្ឋាននគរបាលស្រុកអង្គស្នួល បានសម្រេចកសាងសំណុំរឿង ដែលពលរដ្ឋ ២នាក់ ប្តឹងលោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស្រ៊ី ពីបទរំលោភលើទំនុកចិត្ត ក្នុងអំពើឆបោកប្រាក់អស់រាប់ពាន់ដុល្លារ បញ្ជូនទៅកាន់សាលាដំបូងខេត្តកណ្តាលដើម្បីចាត់ការបន្ត តាមនីតិវិធី។
យោងតាមការបញ្ជាក់ពីប្រធានផ្នែកព្រហ្មទណ្ឌ នៃអធិការនគរបាលស្រុកអង្គស្នួលមន្ត្រីដដែល បានប្រាប់សារព័ត៌ក្នុងស្រុកតាមទូរស័ព្ទនៅព្រឹកថ្ងៃទី០៤ ខែមីនា ឆ្នាំ២០២០នេះថា នគរបាលជំនាញ បានកសាងសំណុំរឿង របស់លោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស្រ៊ី និងបញ្ជូនទៅកាន់តុលាការ ក្រោមការសន្និដ្ឋានចោទប្រកាន់ពីបទ រំលោភលើទំនុកចិត្ត។
លោកប្រធានផ្នែកព្រហ្មទណ្ឌរូបនេះបន្ថែមថា សមត្ថកិច្ចបានសម្រេចបញ្ជូនសំណុំរឿងនេះទៅតុលាការ កាលពីចុងខែកុម្ភៈ ឆ្នាំ២០២០ កន្លងទៅបន្ទាប់ពីនគរបាលកោះហៅ លោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស៊្រី ឲ្យចូលឆ្លើយបំភ្លឺ តាមការប្តឹងរបស់ពលរដ្ឋរងគ្រោះ ប៉ុន្តែជននេះមិនព្រមចូលដោយឲ្យឈ្មោះ ជា គឹមសេន ទាក់ទងទៅសមត្ថកិច្ច និងអះអាងថា ខ្លួន ឡេង ប៊ុនស្រ៊ី ហៅ ហ៊ុន ប៊ុនស្រ៊ី មិនបានដឹងអ្វីទាំងអស់។
តាមការអះអាងរបស់សមត្ថកិច្ច មានជនរងគ្រោះជាដើមបណ្តឹងចំនួន ២នាក់ ដែលបានដាក់ពាក្យប្តឹងលោកផ្កាយ៣ ឡេង ប៊ុនស៊្រី ហៅ ហ៊ុន ប៊ុនស្រ៊ី ពីបទរំលោភលើទំនុកចិត្ត។
ជនរងគ្រោះទី១ឈ្មោះ ម៉ាប់ វណ្ណៈ ភេទប្រុស អាយុ ២៨ឆ្នាំ មានទីលំនៅភូមិរូង ឃុំយុទ្ធសាមគ្គីស្រុកឧដុង្គ ខេខេត្តកំពង់ស្ពឺកាលពីអំឡុងដើមឆ្នាំ២០១៩ បានចាញ់បោកលោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស្រ៊ី ចំនួន ៣,៥០០ដុល្លារ ក្នុងករណីរត់ការចូលធ្វើជាទាហាន ប៉ុន្តែមិនបានសម្រេច។
ចំណែកជនរងគ្រោះទី២ឈ្មោះ លាស់ សុខខេន ភេទស្រី មានទីលំនៅភូមិត្រពាំងឈើនាង ឃុំពើក ស្រុកអង្គស្នួល ខេត្តកណ្ដាល កាលពីអំឡុងពាក់កណ្តាលឆ្នាំ២០១៩ បានចាញ់បោកលោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស្រ៊ីចំនួន ២,០០០ ដុល្លារ ក្នុងករណីរត់ការដោះស្រាយបញ្ចប់រឿងក្តីដីធ្លីនៅតុលាការ ប៉ុន្តែមិនបានសម្រេចដូចការសន្យា។
ជនរងគ្រោះឈ្មោះ ម៉ាប់ វណ្ណៈ បានរៀបរាប់ប្រាប់អ្នកសារព័ត៌មានថា ខ្លួនបានស្គាល់លោកផ្កាយ៣ ឡេង ប៊ុនស្រ៊ី ហៅ ហ៊ុន ប៊ុនស្រ៊ី តាមរយៈឈ្មោះ ណូន រស់នៅក្នុងស្រុកអង្គស្នួល។ ឈ្មោះ ណូន បាននាំជនរងគ្រោះឲ្យជួបលោកផ្កាយ៣ ហ៊ុន ប៊ុនស្រ៊ី ឡេង ប៊ុនស្រ៊ី ដើម្បីឲ្យជួយរត់ការ ចូលធ្វើជាយោធាក្នុងតម្លៃព្រមព្រៀងគ្នាចំនួន ៣,៥០០ដុល្លារ។
ដោយការជឿជាក់លើឈ្មោះ ណូន និងលោកផ្កាយ៣ ហ៊ុន ប៊ុនស្រ៊ី ដែលអះអាងថា ជាសាច់ញាតិថ្នាក់ដឹកនាំកំពូលរបស់ជាតិនិងមានបក្ខពួកច្រើនណាស់ ចង់ធ្វើការនៅស្ថាប័នណាក៏បានដែរ ទើបជនរងគ្រោះព្រមយកលុយចំនួន ៣,៥០០ ដុល្លារ ទៅប្រគល់ឲ្យលោកផ្កាយ៣ ហ៊ុន ប៊ុនស្រ៊ី ឬឡេង ប៊ុនស្រ៊ី ដល់ផ្ទះនៅភូមិអង្គស្នួលទី២ ឃុំពើក ស្រុកអង្គស្នួល ខេត្តកណ្តាល។ ទាក់ទិននិងករណីមានពលរដ្ឋប្តឹងចោទប្រកាន់ខាងលើនេះគេហទំព័រ ក្រៀល ហតញូស៍ នៅពុំទាន់អាចសុំការបញ្ជាក់ពីលោកផ្កាយ៣យោធ ឈ្មោះ ឡេង ប៊ុនស្រ៊ី ហៅ ហ៊ុន ប៊ុនស្រ៊ី បាននៅឡើយទេ ដោយគ្មានលេខទូរស័ព្ទ៕
ក្រៀល ហតញូស៍ៈ088 800 98 33/096 200 98 33.
